Fólk lagt inn á spitala vegna tannsýkinga

Þeim fjölgar sem leggja þarf inn á spítala vegna tannsýkinga. Ein af ástæðum sýkinganna er léleg tannheilsa en dæmi eru um að fólk hafi ekki farið til tannlæknis í áratug.

Á síðustu mánuðum hafa fleiri en áður leitað á háls- nef - og eyrnadeild Landspítalans með sýkingar í munni sem myndast hafa út frá tönnum. Sýkingarnar hafa verið það alvarlegar að þurft hefur að leggja fólkið inn og gefa þeim sýklalyf í æð.

„Fólkið verður veikt. Það getur verið með háan hita. Þetta er bólga og maður sér þetta þá utan á fólki, það er bólguhella og jafnvel roði út á kinn. Það á erfitt með að opna munn. Það á erfitt með að næra sig og þar af leiðandi erfitt með að taka verkja- og sýklalyf í gegnum munn og það kallar á meðferð lyfja í æð," Hannes Petersen, yfirlæknir háls-, nef- og eyrnalækninga á LSH.

Hann segir fólk oft þurfa að liggja inni í nokkra daga. Ekki eru til nákvæmar tölur um hversu marga hefur þurft að leggja inn vegna tannsýkinga síðustu mánuði en Hannes áætlar að það hafi verið tveir til fjórir á mánuði.

Tannsýkingar geta myndast við endajaxla eða eftir endajaxlatöku. Þá hafa bakteríur tengdar skemmdum tönnum sitt að segja.

„Ein ástæðan er sannarleg léleg tannheilsa og skemmdar tennur," segir Hannes.

Hannes segir hugsanlegt að kostnaður við tannlækningar hafi sitt að segja og hræðsla við tannlækna. Flestir sem leita á deildina eru frá tvítugu til fertugs og segir hann tannheilsu sumra þeirra slæma.

„Það má kannski ímynda sér að þessi hópur hafi verið hjá tannlæknum á meðan þeir voru í skóla, en eftir það hafi heimsóknum til tannlækna fækkað, og jafnvel alveg stoppað. Þessir einstaklingar eru kannski að koma með afleiðingar tannskemmda til okkar jafnvel fimm til tíu árum seinna og hafi þá á tímabilinu aldrei hitt tannlækni," segir Hannes að lokum.