Segir umræðu um erfðatækni á algjörum villigötum

Framkvæmdastjóri ORF Líftækni segir að þingsályktunartillaga átta þingmanna um bann við útiræktun á erfðabreyttum líverum gangi þvert gegn vísindalegum rökum. Þá segir hann umræðuna um erfðatækni á algjörum villigötum.

Átta þingmenn úr þremur flokkum, þau Þuríður Backman, Atli Gíslason, Mörður Árnason, Ólafur Þór Gunnarsson, Þráinn Bertelsson, Þór Saari, Birgitta Jónsdóttir og Ólína Þorvarðardóttir hafa lagt fram á Alþingi tillögu til þingsályktunar um fela ríkisstjórninni að skipa starfshóp eigi síðar en 1. janúar á næsta ári sem vinni breytingar á lögum í þeim tilgangi að banna ræktun erfðabreyttra lífvera utandyra. Í þingsályktunartillögunni segir að gagnrýnin á erfðatækni hafi ekki einungis verið bundin við þá siðferðislegu sýn að ekki megi „krukka í" náttúrunni. Oft hafi vantað upp á að tilraunir hafi farið fram á áhrifum afurða sem unnar eru úr erfðabreyttum lífverum á menn og dýr auk þess sem hætt sé við að langtímaumhverfisáhrif erfðabreytinga komi ekki strax í ljós. dr. Björn Örvar, framkvæmdastjóri ORF Líftækni segir við Fréttablaðið í dag að það sé sorglegt að þingsályktunartillagan komi fram núna í kjölfar úrskurðar umhverfisráðherra um að ekki bæri að fella úr gildi heimild fyrirtækisins til akuryrkju á erfðabreyttu byggi í Gunnarsholti.

Vitnað í blaðaskrif einstaklinga sem hafa ekki sérfræðiþekkingu

„Okkur finnst mjög gagnrýnisvert að þingsályktunartillagan er ekki byggð á vísindalegum rökum. Evrópuráðið hefur t.d komist að þeirri niðurstöðu að ekkert bendi til þessa að erfðabreyttar lífverur séu hættulegri umhverfinu eða heilsu manna en hefðbundnar nytjaplöntur. Þetta er niðurstaða sem byggð er á ítarlegum og óháðum rannsóknum sem unnar hafa verið undanfarin tíu ár og kostað hafa Evrópusambandið yfir þrjátíu milljarða króna. Í þingsályktunartillögunni er hins vegar einungis vitnað í blaðaskrif tveggja harðra andstæðinga erfðatækni sem hafa ekki sérfræðiþekkingu á þessu sviði," segir dr. Björn. Hann segir þetta gagnrýnisverð vinnubrögð hjá þingmönnunum. Þá segir hann umræðuna um erfðatækni á algjörum villigötum. „Nú þegar liggja fyrir ályktanir og skýrslur frá Landbúnaðarstofnun SÞ og fleiri stofnunum á þessu sviði þar sem tekin eru af öll tvímæli um þessa tækni."