Blindur piltur kærir vegna ferðaþjónustu: Glatað dæmi

„Félagsþjónustan í Kópavogi er glatað dæmi," segir Oddur Stefánsson, sautján ára blindur piltur í Kópavogi sem þarf aðstoð við að komast lengri vegalengdir milli staða og telur sig ekki njóta lögbundinnar ferðaþjónustu.

Oddur býr í Laufbrekku í Kópavogi, starfar á Blindravinnustofunni í Hamrahlíð í Reykjavík og leggur stund á nám við Flensborgarskóla í Hafnarfirði. Kópavogsbær neitar að niðurgreiða leigubíla fyrir Odd á sama hátt og flest önnur sveitarfélög á höfuðborgarsvæðinu gera fyrir þá sem eru blindir.

Í kæru lögmanns Odds til úrskurðarnefndar félagsþjónustu og húsnæðismála segir að af 470 lögblindum einstaklingum á höfuðborgarsvæðinu fái aðeins 59 einstaklingar ekki niðurgreidda leigubíla. Af þeim búi 51 í Kópavogi. Blindum í Kópavogi sé í staðinn boðið upp á að samnýta akstursþjónustu með hreyfihömluðum og öðrum. Þjónustan sem Oddi sé boðin taki mið af fötlun annars hóps einstaklinga sem hann tilheyri ekki. Þessa þjónustu þarf að panta með eins dags fyrirvara hjá fyrirtækinu Smartbílum og geta verið fleiri en einn saman í ferðum. Leigubílana er hins vegar hægt að panta samdægurs.

Lögmaðurinn segir Kópavogsbæ fortakslaust bera að veita Oddi ferðaþjónustu sem geri honum kleift að stunda atvinnu og nám og njóta tómstunda. Oddur segir það bagalegt að ferðir séu samnýttar. „Það þýðir fyrir mig að ég kem of seint í vinnuna og fæ lítið sem ekki neitt útborgað," segir hann.

Oddur kveðst nú lítið sem ekkert nýta aksturinn frá félagsþjónustu Kópavogs. Það geri hann helst ef hann sé að fara að heimsækja félaga sína. Í staðinn noti hann bíla frá Hreyfli-Bæjarleiðum þar sem hann fái um fimmtungs afslátt í gegnum Blindrafélagið. Það er þó margfalt dýrara en væri ef Oddur fengi niðurgreiddar leigubílaferðir frá sveitar­félaginu. „Ég ætla að vona að Kópavogsbær láti undan fyrst það er búið að kæra," segir hann.

Ekki náðist í Guðrúnu Pálsdóttur bæjarstjóra í gær. Í bréfi Guðrúnar til lögmanns Odds í nóvember sagði að aðeins fjórir einstaklingar í Kópavogi, þar af tveir blindir, fengju þá leigubílaþjónustu sem Oddur vildi. „Um er að ræða undantekningartilvik," undirstrikaði bæjarstjórinn.

gar@frettabladid.is