Elding lýsti upp Reykjavík

Þremur eldingum sló niður austur af höfuðborgarsvæðinu laust fyrir klukkan hálf sjö í morgun með viðeigandi þrumum á eftir. Eldingarnar voru meðal annars vel sjáanlegar í Reykjavík.

Um svipað leiti urðu margar eldingar í Öræfasveit, suður af Vatnajökli. Búast má við eldingum í éljaviðri eins og nú ríkir.

Fleiri hundruð manns gistu í Hrútafirðinum í nótt, í Hótel Staðarflöt, Reykjaskóla, Sæbergi og á Borðeyri.

Auk þess hafðist fjöldi manns við í Staðarskála, en Holtavörðuheiðin, Öxnadalsheiðin og Brattabrekka lokuðust vegna veðurofsa.

Fólk var farið að tínast af stað undir morgun. Um tíma hafðist líka fjöldi fólks við í Borgarnesi þar sem Borgarfjaðrarbrú var lokað vegna sjógangs.

Röskun varð á millilandaflugi eftir að um það bil þúsund manns urðu að bíða í nokkrar klukkustundir um borð í vélum sínum á Keflavíkurflugvelli í gærkvöldi.

Allt innanlandsflug stöðvaðist. Skip og bátar leituðu vars eða sigldu í land undan óveðrinu og er ekki vitað um óhöpp til sjós.