Sendir danska ferðamenn til Íslands

Íslensk kona sem búsett er í Danmörku hefur stofnað ferðaskrifstofuna Islandsrejser þar í landi og býður nú íslandsþyrstum Dönum upp á fjölbreytta ferðamöguleika vilji þeir heimsækja heimahaga hennar. Hún segir starfsemina ganga eins og í sögu en einu erfiðleikarnir virðist felast í skorti á dönskumælandi fólki í íslenskum ferðaiðnaði.

Kolbrún Pálsdóttir hefur búið í Danmörku í rúm 8 ár og segir að frá því hún hafi fyrst drepið þar niður fæti hafi heimamenn ávallt sýnt mikinn áhuga á því að fara til Íslands. Það hefur tekið hana tvö ár að koma ferðaskrifstofunni á fót en hún var formlega opnuð þann 26. maí síðastliðinn. Vefsíða Kolbrúnar var hinsvegar opnuð fyrir tveimur mánuðum og tókst fyrirtækið þá strax á loft en Kolbrún segir starfsemina nánast hafa gengið of vel þar sem hún hefur selt tæpar 30 ferðir á tveimur mánuðum auk þess sem hún sé að vinna úr fyrirspurnum margra hópa.

Helsta vandamálið sem komið hefur upp frá opnun skrifstofunnar virðist vera skortur á dönskumælandi Íslendingum í ferðabransanum en Kolbrún segist hafa lent í vandræðum þegar hún setur saman ferðir fyrir eldri Dani, sem margir hverjir eigi erfitt með að tala ensku. Hún segir skóladönsku Íslendinga ná heldur stutt, en færnin aukist hratt með smá æfingu.

Kolbrún er alveg ný í ferðaiðnaðinum en hún var í kjötvinnsunámi áður en hún ákvað að láta drauminn um Islandsrejser verða að veruleika. Hún segir í raun fátt hafa unnið með sér að þeirri staðreynd undanskilinni að hún er Íslendingur og þekkir landið, en þrátt fyrir reynsluleysi virðist starfsemin hafa rokið af stað og segir Kolbrún góðar viðtökur samstarfsaðila á Íslandi hafa hjálpað sér mikið.

Hér má nálgast vefsíðu Islandsrejser: www.islandsrejser.dk