Hæstiréttur: Dæmd fyrir að stinga konu í höfuð og kveikja í fataskáp

Hæstiréttur Íslands staðfesti dóm Héraðsdóms Reykjavíkur yfir fimmtugri konu, Bergþóru Guðmundsdóttur, en hún hlaut tveggja og hálfs árs fangelsi fyrir margvisleg brot á síðasta ári.

Hún var meðal annars dæmd fyrir að stinga aðra konu tvívegis í höfuðið með eldhúshnífi í ágúst í fyrra með þeim afleiðingum að konan, sem ráðist var á hlaut tvo skurði á höfði. Þá var hún jafnframt dæmd fyrir að kveikja í fataskáp í klefa samfanga síns, Catalinu Mikue Ncogo, í febrúar á síðasta ári með þeim afleiðingum að fatnaður og önnur verðmæti eyðilögðust. Loks var hún dæmd fyrir að stela fatnaði og öðrum verðmætum úr Hagkaup í júlí í fyrra.

Fram kemur í dómnum að konan sem Bergþóra réðst á hafi áður lamið hana í höfuðið með steikarpönnu og hugsanlega buffhamri. Sú árás hafi hins vegar verið yfirstaðin og því geti Bergþóra ekki borið við sjálfsvörn í málinu.

Bergþóra á langan brotaferil á baki og hefur meðal annars hlotið tólf ára fangelsisdóm fyrir morð.