Segir forseta brigsla ráðamenn um landráð og líkir honum við Lady Ga Ga

Jón Baldvin Hannibalsson, fyrrverandi ráðherra, gagnrýnir forseta Íslands, Ólaf Ragnar Grímsson, harðlega í grein sem birtist í Fréttablaðinu og á Vísi í dag. Þar segir Jón Baldvin forsetann brigsla ríkisstjórnina um landráð, „með því að semja um Icesave – beygja sig fyrir fáránlegum kröfum og ofbeldi Breta og Hollendinga, eins og hann [Ólafur Ragnar  innskt. blm.]kallar það – hafi ríkisstjórnin brugðist þjóðarhagsmunum,“ skrifar Jón Baldvin.

Hann bætir við að  Ísland sé eina ríkið í heiminum, „svo mér sé kunnugt um, þar sem forseti ríkisins getur brigslað sitjandi ríkisstjórn um landráð, án þess að það gerist nokkuð. Engin viðbrögð,“ skrifar Jón Baldvin og spyr síðan:  „Hvurnig er það – tekur enginn mark á forsetanum?“

Jón Baldvin segir síðan að ríkisstjórn Íslands geti ekki látið meint svikabrigsl forsetans eins og vind um eyru þjóta.

„Ef forsetinn sér ekki sjálfur sóma sinn í að gæta tungu sinnar, geta ábyrgir stjórnmálaleiðtogar – eins og ráðherrar utanríkis- og ríkisfjármála – ekki lengur leyft sér að láta hjá líða að svara fullum hálsi – þegar forsetinn fer yfir strikið. Þeim er skylt að taka af tvímæli um, hverjir beri ábyrgð á íslenskum þjóðarhagsmunum,“ skrifar Jón.

Jón Baldvin lætur svo fylgja með spaugilegt augnablik sem hann upplifði í Eistlandi á dögunum. Hann lýsir því svona:

„Áður en forsetinn flutti ræðuna hafði eistneski utanríkisráðherrann á orði, að dætur hans ungar væru í sjöunda himni, af því að þeim hefði hlotnast sú náð að taka í höndina á átrúnaðargoði sínu – poppstjörnu, sem væri þekkt sem hin eistneska „Lady Ga Ga“. Nærstaddur landi vor, sem heyrði þetta, missti þá út úr sér: Heldurðu að þær verði nokkuð minna upp með sér af því að fá að taka í höndina á okkar íslenska „President Ga Ga“?“

Á þeim nótum endar Jón Baldvin grein sína þegar hann spyr hvort það þurfi að útskýra málið fyrir viðsemjendum landsins með sögunni af „Lady Ga Ga“?