Margrét Tryggvadóttir: Brennum húsið og byggjum nýtt

„Mér finnst mjög mikilvægt að við leyfum okkur að byrja með hreint borð. Þetta hrun var eins og þegar þú færð veggjatítlur í húsið þitt þá reynir þú ekki að endurbyggja það úr sömu spýtunum. Þú bara brennir húsið og byggir nýtt. Við þurfum að gera það því þetta er allt orðið svo úrkynjað,“ segir Margrét Tryggvadóttir, þingmaður Hreyfingarinnar. Þessu er Einar K. Guðfinnson, þingmaður Sjálfstæðisflokksins, ósammála. „Ég get ekki tekið undir með Margréti að við þurfum að byrja á því að rífa allt niður til að byggja upp. Mér finnst í grunninn okkar íslenska samfélag gott.“

Margrét, Einar og Gunnar Smári Egilsson ræddu meðal annars um stjórnmálaflokka, breytingar eftir hrun og stjórnlagaþingið í útvarpsþætti Sigurjóns M. Egilssonar á Bylgjunni fyrr í dag.

„Ég myndi segja af mér“

Þegar talið barst að stjórnlagaþinginu sagði Margrét: „Ef ég væri sá ráðherra sem bæri ábyrgð á þessu þá hugsa ég að ég myndi segja af mér.“

Einar vildi aftur á móti lítið segja hvað hann myndi gera í samskonar stöðu. Hann benti á þeir sem hæst hafi talað um pólitíska ábyrgð á undanförnum árum sitji nú í ríkisstjórn. „Sérstaklega forsætisráðherrann okkar sem hefur talað svona í 30 ár og mér finnst spjótin núna beinast að henni."

Krefst afsagnar

Einar vill að Jóhanna segi af sér embætti. „Mér finnst þetta mál snúast meira um forsætisráðherra en innanríkisráðherra.“

Í framhaldinu hélt Margrét uppi vörnum fyrir Jóhönnu og sagði að frumvarpið sem Jóhanna lagði fram hafi verið ónýtt og allsherjarnefnd hafi þurft að klippa það í sundar og líma saman. „Lögin um stjórnlagaþingið eru allt allt öðruvísi en frumvarpið sem Jóhanna lagði fram. Þannig að það er ekki alveg hægt að segja að hún beri ábyrgð á þessari lagasetningu umfram aðra þingmenn. Hún sagði sagði já og ég sagði líka já.“