Hanna Birna: Fóru rangt með staðreyndir til að breiða yfir klúður

Oddviti Sjálfstæðisflokksins í borgarstjórn segir meirihlutann hafa farið rangt með staðreyndir til að breiða yfir klúðurslegar yfirlýsingar borgarstjóra um Orkuveituna. Ársreikningar sýndu að fyrirtækið væri ekki gjaldþrota.

Orkuveita Reykjavíkur átti aðgang að átta milljarða lánalínu hjá Landsbanka Íslands á sama tíma og forstjóri fyrirtækisins sagði fyrirtækið gjaldþrota og ekki hægt að borga starfsfólki laun. Ársreikningar fyrirtækisins sýna jafnframt að staðan virðist ekki jafn slæm og haldið hefur verið fram af stjórnendum Orkuveitunnar síðustu daga.

„Þá er óábyrgt og ósatt að halda því fram að fyrirtækið sé gjaldþrota. Ég veit ekki hvort menn hafi haldið þessari orðræðu áfram um að fyrirtækið sé á hausnum til að sanna það að ummæli um títtnefnt gjaldþrot hafi á sínum tíma verið rétt. Og nú sé komið að því að sýna að svo hafi verið ef það er gert með þeim hætti er það ekki ábyrgt gagnvart fyrirtækinu og ekki til þess að ávinna því traust. Tekjustreymi og staða fyrrirækisins er slík að það er algjörlega óábyrgt og ósatt að halda því fram að fyrirtækið sé gjaldþrota," sagði Hanna Birna Kristjánsdóttir á fundi borgarstjórnar í dag þar sem björgunarpakki meirihlutans var formlega samþykktur.

Hanna Birna sagði erlendar lánastofnanir hafa verið jákvæðar í garð þess að veita Orkuveitunni lán en um áramótin hefði viðmót þeirra breyst. Sagði hún ummæli borgarstjóra og samstarfsmanna hans spila þar stóran þátt.

„Og ummælin verða ekkert betri nokkrum mánuðum seinna þegar reynt er að kalla þessar aðgerðir björgun frá gjaldþroti," sagði Hanna Birna.

Jón Gnarr svaraði fyrir sig.

„Af gefnu tilefni vil ég segja að vanda fyrirtækisins megi reka til ummæla minna eða annara finnst mér óábyrgt og ábyrgðarlaust tal og einungis til þess gert að leiða athygli frá því að leiða athygli frá því sem raunverulegt er og satt og rétt."