Rifja upp Sædýrasafnið í París

Leikritið Sædýrasafnið, sem var frumsýnt í Þjóðleikhúsinu árið 2008, verður sýnt í París á næstu dögum. Leikarahópurinn er nýkominn til Parísar og ætlar að dvelja þar í tíu daga. Stefnt er á sex til sjö sýningar á þeim tíma.

„Við vorum að mæta í gær [fyrradag] í skítakulda. Maður reynir að njóta þess að vera í París þegar maður á tíma aflögu en svo ætlum við að rifja upp þessa sýningu, sem við höfum ekki gert í átján mánuði," segir Björn Hlynur Haraldsson, einn leikaranna.

Höfundur Sædýrasafnsins er Marie Darrieussecq, sem er ein þekktasta skáldkona Frakklands. Eftir að sýningum lauk í Kassanum í Þjóðleikhúsinu var leikritið sýnt í ríkisleikhúsinu í Orléans í Frakklandi í maí 2009 og núna hefur rykið verið dustað af verkinu. Að sögn Björns Hlyns hefur uppsetning leikritsins vakið athygli í Frakklandi, bæði vegna höfundarins Darrieussecq og vegna aðkomu danshöfundanna Ernu Ómarsdóttur og Damiens Jalet sem eru kunn í Frakklandi, rétt eins og Barði Jóhannsson sem semur tónlistina.

Sædýrasafnið fjallar um tvær fjölskyldur sem neyðast til að dvelja saman við undarlegar aðstæður á sædýrasafni. Meðal annarra leikara í verkinu eru Elva Ósk Ólafsdóttir, Ívar Örn Sverrisson og Margrét Vilhjálmsdóttir.

- fb