Varað við stormi í kvöld og í nótt

Veðurstofa Íslands gerir ráð fyrir vestan stormi í kvöld og er reiknað með að vindhraði nái 18-23 metrum á sekúndu. Þá er búist við dimmum éljum við suðurströndina, en einnig brestur sama veður skyndilega á vestanlands um og eftir miðnætti og norðvestanlands þegar líður á nóttina eða undir morgun.

„Vindhraði í éljum gæti orðið 25-30 m/s og talsverðar líkur eru á að færð spillist sunnan- og vestanlands," segir ennfremur en gert er ráð fyrir að á morgun dragi smám saman úr vindi og éljum.