Nafnlausir fræðimenn fá tugi milljóna

Ríkisendurskoðun kannar nú kostnað ráðuneyta við aðkeypta þjónustu starfsmanna félagsvísindasviðs Háskóla Íslands. Í svörum forsætisráðherra við fyrirspurn um málið kemur fram að 30 milljónir hafa verið greiddar til Háskólans en ekki er upplýst hvaða fræðamenn fengu greiðslurnar.

Fyrir áramót samþykkti forsætisnefnd Alþingis að krefja ríkisendurskoðun um úttekt á kostnaði ráðuneyta við aðkeypta þjónustu, ráðgjöf og sérverkefni núverandi starfsmanna félagsvísindasviðs Háskóla Íslands frá maí 2007 til nóvermber 2010. Forsaga málsins er sú að Guðlaugur Þór Þórðarson alþingismaður lagði fram samhljóma fyrirspurn á Alþingi en fékk ónákvæm svör sem ekki þótu tæmandi. Þingmaðurinn taldi því rétt að biðja forsætisnefnd um að vísa málinu til ríkisendurskoðenda.

Í svörum ráðherra við fyrirspurnum Guðlaugs Þórs og Kristjáns Þórs Júlíussonar er ekki upplýst hvaða aðilar unnu verkefni í þeim tilfellum sem Háskóli Íslands er skráður verksali. Í svörunum kemur þó fram að tæpar 30 milljónir hafa verið greiddar Háskóla Íslands þó ekki sé gefið upp hvaða fræðamenn hafi fengið þær greiddar.

Í skjölum sem fréttastofa hefur undir höndum kemur fram að nokkuð virðist um að einstakir sérfræðingar fái greitt ofan á hefðbundin laun fyrir störf í nefndum. Þar segir t.d. að í nefnd um heildarendurskoðun laga um stjórnarráð Íslands hafi Anna Kristín Ólafsdóttir, fyrrum aðstoðarmaður Þórunnar Sveinbjarnardóttur, fengið tæplega 1200 þúsund krónur í sérfræðikostnað og Sigurbjörg Sigurgeirsdóttir tæplega 1,7 milljónir króna. Aðrir nefndarmenn fengu ekki greitt fyrir sérfræðistörf.

Þá fékk Gunnar Helgi Kristinsson 800 þúsund krónur, Oddný Mjöll Arnardóttir 950 þúsund krónur og Kristín Benediktsdóttir 720 þúsund krónur í laun fyrir sérfræðistörf í nefnd um tillögur að viðbrögðum við skýrslu rannsóknarnefndar Alþingis. Aðrir nefndarmenn fengu ekki greitt aukalega ofan á laun sín fyrir nefndarstörf þó svo að í báðar þessar nefndir hafi haft starfsmenn.