Forsætisráðherra fetar sig áfram á Facebook

Stjórnmálamenn nýta sér Facebook í auknum mæli til upplýsingagjafar fyrir stuðningsmenn sína og almenning. Jóhanna Sigurðardóttir forsætisráðherra er þar engin undantekning. Hún hefur verið með Facebook síðu um langt skeið en segir á síðu sinni í gær að hún ætli að auka notkun hennar.

„Á nýju ári hyggst ég feta mig áfram í notkun á þessum öfluga samskiptavef og mun nýta hann í auknum mæli til upplýsingagjafar. Héðan í frá verður þessi vettvangur því opinber fésbókarsíða mín. Ég hlakka til áframhaldandi samfylgdar á þeim spennandi tímum sem framundan eru," segir Jóhanna í færslu frá því í gær.

Jóhanna notaði meðal annars Facebook í gær til að fagna stuðningi við kröfuna um þjóðareign á auðlindum sem birtist í áskorun tug þúsunda Íslendinga um að þjóðaratkvæðagreiðsla fari fram um eignarhald á orkuauðlindum Íslands og nýtingu þeirra. Þar var Jóhanna að vísa til undirskriftasöfnunar sem Björk Guðmundsdóttir söngkona og fleiri hafa staðið að undanfarið.

Smelltu hér til að sjá fésbókarsíðu Jóhönnu.