Vilhjálmur Hans: Það verður stríðsástand ef Eiður sigrar

„Ef að stefnandi hefur betur þá verður ekki búsáhaldabylting heldur stríðsástand," sagði Vilhjálmur H. Vilhjálmsson, verjandi og bróðir Inga F. Vilhjálmsonar, blaðamanns DV, sem knattspyrnukappinn Eiður Smári Guðjohnsen, vill meina að hafi brotið á friðhelgi einkalífs síns.

Eiður krefst fimm milljóna í skaðabætur en aðalmeðferð í málinu fór fram í Héraðsdómi Reykjavíkur í morgun.

Vilhjálmur sagði málið snúast um grundvöll tjáningafrelsis og að ef dómur félli Eiði í hag, „geta þessir herramenn fyrir aftan mig, pakkað saman og farið heim," sagði Vilhjálmur og átti þá við blaðmenn sem sátu inn í réttarsalnum. Hann sagði almenning þá ekki fá upplýsingar um hrun bankanna og sagðist búast við stríðsástandi ef svo færi.

Vilhjálmur gerði athugasemdir við skaðabótakröfu Eiðs og spurði hvort hann hefði sýnt fram á nokkurn skaða. Vilhjálmur vildi meina að svo væri ekki og spurði í kjölfarið: „Hefur hann yfir höfuð misst svefn yfir þessu?"

Vilhjámur benti einnig á að ekki væri deilt um sannleikann í þessu máli heldur hvort málið snérist um friðhelgi einkalífsins. Vilhjálmur sagði Eið hafa komið víðsvegar fram í fjölmiðlum undanfarin ár. Benti Vilhjálmur meðal annars á myndbrot úr mynddisknum „Atvinnumennirnir okkar", þar var ekki aðeins rætt við Eið heldur einnig eiginkonu hans og börnin þrjú.

Þá fannst Vilhjálmi það skjóta skökku við að það hefði verið fjallað um Eið á jákvæðan hátt, meðal annars um fjármál hans í gegnum tíðina, en ekki nú mðe neikvæðari formerkjum. Hann sagði Eið opinbera persónu sem þyrfti að þola hið neikvæða í umfjöllun fjölmiðla.

„Þetta er eins og það hefði eingöngu verið fjallað um velgengni Eiðs þegar hann spilaði með Barcelona en svo væri ekki minnst á það þegar hann var ekki valinn í leikmannahóp Stoke City," sagði Vilhjálmur og vitnaði þarna í fótboltaferil Eiðs.

Verjandi Eiðs sagði í ræðu sinni að gögnin sem umfjöllun Inga um Eið var byggð á, væru stolin.

Reynir Traustason ritstjóri DV sagðist engu vilja svara til um það hvaðan gögnin í málinu komu, enda hefði það ekki tíðkast. Mikilvægast sé að í málinu hafi verið sagt satt og rétt frá og að sínu viti sé ekki um það deilt. Staðreyndin sé sú að Eiður hafi fengið góðar fyrirgreiðslur í bönkum hér á landi fyrir hrun og sé einn af okkar litlu útrásarvíkingum.

Málið sé risastórt í þeim skilningi að fái Eiður sínu framgengt sé búið að þagga niður í blaðinu varðandi umfjallanir um svipuð mál. Þá skipti engu hvort um sé að ræða Björgólf Thor, Jón Ásgeir, Hannes Smárason eða nokkurn annan, sagði Reynir.