Ættleiðingardagar hjá Dýrahjálp Íslands

Kettir, hundar, kanínur og önnur gæludýr af öllum stærðum og gerðum leita nýrra eigenda í Dýraríkinu á morgun þar sem ættleiðingardagar Dýrahjálpar Íslands fara fram.

Dýrahjálp Íslands er félag sjálfboðaliða sem koma dýrum sem misst hafa heimili sín í tímabundið fóstur og reyna að finna fyrir þau ný heimili.

Félagið var stofnað í maí árið 2008 og hefur síðan aðstoðað fjölda dýra við að finna nýja eigendur, en hvorki fleiri né færri en 489 hundar, 564 kettir, 87 kanínur, 16 hamstrar, 44 fuglar, 3 mýs, 56 naggrísir, 6 fiskar og 2 önnur dýr hafa fundið nýjan samastað með hjálp samtakanna.

Á ættleiðingardögunum gefst fólki tækifæri til að skoða dýr í heimilisleit og sjá hvort ekki leynist kisa eða voffi sem gæti orðið hluti af fjölskyldunni. Dýrin ásamt fulltrúum Dýrahjálpar verða í Dýraríkinu í Garðabæ á milli 13:00 til 17:00 á morgun, laugardaginn 8.janúar. En líka er hægt að skoða dýrin á heimasíðu Dýrahjálpar, www.dyrahjalp.is