Brýnt að ný raforkulög nái í gegn á þingi

Forsvarsmenn orkumála og -dreifingar eiga fundi með iðnaðarráðherra eftir helgi þar sem fara á yfir þær brotalamir sem leitt hafa til þess að tafist hefur að endurreikna gjaldskrá Landsnets. Þá hefur ráðuneytið ákveðið að kalla eftir úttekt í samstarfi við erlenda sérfræðinga á regluverki og skilvirkni raforkumarkaðarins.

Í umfjöllun Kastljóssins síðustu daga hefur því verið haldið fram að Landsnet hafi oftekið gjöld fyrir rafmagnsflutning, bæði af stórnotendum og almenningi.

„Þetta er bara rangt,“ segir Þórður Guðmundsson, forstjóri Landsnets. Hann bendir á að á sama tíma og orkufyrirtæki hafi hækkað mjög gjaldskrár sínar til almennings hafi Landsnet ekki nýtt tekjuheimildir sínar.

Undir þetta er tekið í tilkynningu iðnaðarráðuneytisins í gær og áréttað að gjaldskrá Landsnets fyrir flutning raforku til almennings hafi að öllu leyti verið innan tekjumarka Orkustofnunar.

Þórður bendir hins vegar á að þar sem árið 2007 hafi verið ákveðið að miða gjaldskrá stórnotenda við Bandaríkjadal hafi við hrun gjaldmiðilsins hér myndast gengishagnaður sem leiðrétta þurfi. Þessi hagnaður er talinn nema um sex milljörðum króna.

Guðni A. Jóhannesson orkumálastjóri bendir á að innheimtukerfi flutningsgjalda raforku sé jöfnunarkerfi þar sem ýmist sé tekið of eða van. „Kerfið gerir ráð fyrir því að menn geti safnað upp og tekið minna á næsta tímabili,“ segir hann, en í nýjum raforkulögum sem bíða annarrar umræðu á Alþingi er jöfnunartími sem draga á úr sveiflum í orkuverði lengdur úr þremur árum í tíu.

Í nýju lögunum er einnig gert ráð fyrir að bæði eignagrunnurinn sem liggur til grundvallar og gjaldskrá Landsnets verði í Bandaríkjadölum og þar með fjarlægð hættan á að gengismunur myndist. Frumvarpið hefur verið til umfjöllunar hjá Alþingi síðan í apríl í fyrra. Þórður og Guðni árétta báðir mikilvægi þess að frumvarpið fái afgreiðslu á þessu þingi, en það er einnig gert í tilkynningu iðnaðarráðuneytisins.

Þá viðurkennir Guðni að töf hafi orðið á endurútreikningi tekjugrunns Landsnets þar sem hlutur stórnotenda hafi aukist á kostnað almennra notenda. „Sú vinna er nú á lokastigi. Reynist ný skipting hagstæðari almennum notendum, eins og allt bendir til, munu notendur njóta þess í lægri gjaldskrá á næstu árum,“ segir í tilkynningu ráðuneytisins.

olikr@frettabladid.is