Karókímót um allt land til verndar auðlindunum

Karókímaraþonið í Norræna húsinu stóð sleitulaust frá klukkan þrjú í gær og til miðnættis. Þegar hafa safnast rúmlega 28 þúsund undirskriftir á vefinn Orkuaudlindir.is og heldur maraþonið áfram klukkan þrjú í dag.

Skipuleggjendur vonast til þess að haldin verði samhliða karaókímót um allt land. Menn eru hvattir til að smella upp karaókígræjunum eða bara koma saman og syngja við undirleik.

Nú þegar hefur verið ákveðið að halda karaókí- og orkuauðlindasamkomum á Akureyri, Bolungavík, Skagaströnd og Selfossi og óstaðfestar fregnir herma að söngsamkomur verði haldnar á Suðurnesjum, Stykkishólmi, á Höfn og á Egilsstöðum.

Í tilefni af náttúruverndarvakningunni hefur tónlistarmaðurinn Steinn Kárason ákveðið að gefa lag sitt Paradís, sem er óður náttúruverndarsinna til Íslands. Lagið er hægt að nálgast ókeypis á vefsíðunni Steinn.is á meðan karókímaraþonið stendur yfir, eða þar til 35 þúsund einstaklingar hafa skrifað undir áskorunina um að halda náttúruauðlindum í almannaeigu.

Guðmundur F. Benediktsson syngur lagið. Steinn semur sjálfur bæði lag og texta en textann má sjá hér að neðan.



Paradís

Ég man mitt Ísland,

mitt ómfagra Ísland,

þegar sólin skín um nótt

og heitur hver gýs.

Brosið þitt blíða,

blóðbergið mitt fríða.

Þínir ljósgullnu lokkar

og laufguð er björk.

Ég ann þér Ísland,

ég ann þér vina

ég nýt þín um nætur

uns nýr dagur rís.

Og ég hélt ég væri,

já, ég hélt ég væri,

ég hélt ég væri kominn

hálfa leið í paradís.

Hvílík nánd samt svo fjarri því.

Ég ann þér Ísland,

ég ann þér vina,

þegar sólin skín um dag

og ilmar græn jörð.

Ég ann þér Ísland,

ég ann þér vina

þegar vont er veður

og vindurinn hvín.

Ég ann þér Ísland,

ég ann þér vina

þegar fönnin fýkur

og frostið er kalt.

Og mér finnst ég vera,

já, mér finnst ég vera,

mér finnst ég vera kominn

alla leið í paradís.

Hvílík nánd með þér í paradís.

Ég ann þér Ísland,

ég ann þér vina.

Þegar nótt er niðdimm

og norðurljós græn.

Ég ann þér Ísland,

ég ann þér vina.

Þegar grassins dögg grætur

og golan er hlý.

Þú elur mig Ísland.

Þú elskar mig vina.

Þegar lífsgöngu líkur

leggst torf yfir ná.

Þú elur mig Ísland.

Þú elskar mig vina.

Þökk sé þér móðir.

Þökk sé þér mær.

Og ég veit ég er,

já, ég veit ég er,

já, ég er núna kominn

alla leið í paradís.

Hvílík nánd með þér í paradís.