Ráðuneyti flytjast til

Breytingar á húsnæðisskipan stjórnarráðsins vegna sameininga ráðuneyta hafa verið ákveðnar og hrint í framkvæmd að hluta. Sameining ráðuneyta heilbrigðis- og félagsmála í velferðarráðuneyti og ráðuneyta samgöngu- og dómsmála í innanríkisráðuneyti kallaði á flutninga.

Velferðarráðuneytið verður í Hafnarhúsinu við Tryggvagötu. Þar hefur félagsmálaráðuneytið verið en heilbrigðisráðuneytið í Vegmúla.

Innanríkisráðuneytið verður við Sölvhólsgötu 7. Samgönguráðuneytið var í Hafnarhúsinu og dómsmálaráðuneytið í Skuggasundi 3.

Efnahags- og viðskiptaráðuneytið flyst af Sölvhólsgötu 7 yfir í gamla húsnæði dómsmálaráðuneytisins við Skuggasund. Fjársýsla ríkisins hefur líka verið til húsa við Sölvhólsgötuna en flyst í gamla húsnæði heilbrigðisráðuneytisins við Vegmúla.

Vinnumálastofnun, sem verið hefur í Hafnarhúsinu, flyst svo í Kringluna 1, þar sem Morgunblaðið var eitt sinn til húsa, og verður undir sama þaki og Umboðsmaður skuldara.

bjorn@frettabladid.is