Áfrýja niðurstöðu dómstólsins í New York

„Skilyrði sem dómarinn setti hafa ekki verið uppfyllt og eins teljum við rétt að láta reyna á þetta fyrir áfrýjunardómstól," segir Steinunn Guðbjartsdóttir, formaður slitastjórnar Glitnis sem hefur áfrýjað niðurstöðu dómstóls í New York í Bandaríkjunum um að vísa frá skaðabótamáli á hendur fyrrverandi eigendum og stjórnendum bankans og endurskoðunarfyrirtækinu Price Waterhouse Coopers.

Steinunn staðfesti þetta í samtali við fréttastofu.

Dómari vísaði málinu frá í desember á síðasta ári með þeim orðum að málið ætti heima á Íslandi en ekki í New York. Dómarinn setti hins vegar þau skilyrði fyrir frávísuninni að stefndu myndu fallast á að íslenskir dómstólar hefðu lögsögu í málinu og að eignir þeirra í útlöndum yrðu aðfarahæfar ef þeir myndu tapa málinu. Slitastjórn telur hins vegar að yfirlýsingar hinna stefndu uppfylli ekki þessi skilyrði og því hafi verið ákveðið að áfrýja málinu.