Myndbútur að vali þingvarðar í dómi

Yfirþingvörður í Alþingis­húsinu ákvað upp á eigin spýtur að velja og geyma stuttan kafla úr öryggismyndavél, þar sem sjá mátti nímenningana hópast inn í Alþingishúsið 8. desember 2008. Aðrar upptökur, fyrir og eftir atburðinn, voru ekki varðveittar og eyddust sjálfkrafa á viku til tíu dögum.

Þetta kom meðal annars fram við aðalmeðferð málsins á hendur nímenningunum í héraðsdómi í gær. Þingvörðurinn, Guðlaugur Ágústsson, valdi sjálfur myndskeiðið sem geymt var, sýndi það forsætisnefnd og það er nú notað sem sönnunargagn í málinu.

„Það er slæmt að langstærstur hluti myndbandsins skyldi vera látinn eyðast, því að það hefði getað upplýst um atvik sem skiptu verulegu máli um sönnunarfærslu í málinu,“ segir Brynjar Níelsson hrl., verjandi tveggja sakborninga. Hann bendir á að ákært hafi verið fyrir brot sem hefðu átt að sjást á því myndbandi, hefði það verið fyrir hendi.

Gögn frá lögreglu, sem hafa að geyma myndir og fingraför voru lögð fram í gær í upphafi aðalmeðferðarinnar í máli þessara níu einstaklinga sem ákærðir eru fyrir innrás á Alþingi. Lára V. Júlíusdóttir, settur saksóknari, lagði fram gögnin.

Sakborningarnir níu voru sammála um sum atriði, svo sem að þeir hefðu ekki farið inn í Alþingishúsið í heimildarleysi heldur hefðu þeir verið í fullum rétti til þess að fara inn í húsið, enda hefði ekkert gefið til kynna að þingpallar væru lokaðir. Sumir þeirra neituðu að svara spurningum saksóknara um hvers vegna þeir hefðu farið inn. Aðrir sögðust hafa farið inn til þess að koma sjónarmiðum sínum á framfæri og láta í sér heyra.

Í aðalmeðferðinni var sýnt myndband úr öryggismyndavél af því þegar hópurinn fór inn í þinghúsið. Þar mátti sjá að til stympinga kom milli einhverra nímenninganna og þingvarða, þegar hinir síðarnefndu reyndu að stöðva fólksstrauminn inn. Sýning myndbandsins vakti töluverða kátínu í dómsal og mátti heyra hlátrasköll þegar það sýndi sem mestan atgang við útidyr þinghússins. Myndbandinu lauk á því að lögreglumenn komu þjótandi á vettvang.

Einn sakborninga vakti athygli dómara á því að undarlegt væri að atburðarásin væri einungis sýnd þar til lögregla kom að húsinu en ekki eftir að laganna verðir voru komnir inn.

Sakborningarnir, sem vildu á annað borð svara spurningunni um hvort ætlunin hefði verið að raska störfum þingsins, sögðu svo ekki hafa verið. Þó kvaðst einn þeirra hafa gert sér grein fyrir því að þetta gæti haft í för með sér einhverja röskun á störfum Alþingis.

Saksóknari upplýsti að fram hefði komið við skýrslutökur hjá lögreglu að miðum hefði verið dreift fyrir atburðina í Alþingis­húsinu þar sem fólk hefði verið hvatt til mótmælanna. Sakborningar ýmist neituðu að tjá sig um það hvort mótmælin hefðu verið skipulögð eða neituðu að svo hefði verið. Þá kannaðist enginn við að hafa lent í stympingum við þingverði eða lögreglu, né að hafa borið vopn eða barefli af einhverju tagi.

jss@frettabladid.is