Níumenningarnir: "Ég er líka sekur um glæp"

Skýrslutökum í máli ákæruvaldsins gegn níumenningunum lauk um klukkan tvö. Verjendur leiddu fyrir dóminn þrjú vitni sem öll áttu það sammerkt með sakborningunum að hafa tekið þátt í hinni meintu árás á Alþingi. Sjúkraliðinn og mótmælandinn Lárus Páll Birgisson bað dóminn um að ákæra sig líka. Ef glæpur hafi verið framinn væri hann líka sekur.

"Bíddu er þetta búið," sagði Lárus þegar ekki bárust fleiri spurningar frá ákæruvaldi. "Ég ætti líka að vera ákærður." Dómarinn sagði þetta hvorki stað né stund fyrir yfirlýsingar. "Er ég ekki í réttarsal," svaraði Lárus og fékk sér því næst sæti hjá sakborningum sem vakti upp hlátur hjá áhorfendum í sal.

Lárus var þriðja vitnið sem verjendur tefldu fram en öll vitnin þrjú eiga það sammerkt að hafa tekið þátt í aðgerðunum til jafns við sakborningana níu. Búast má við því að ein af megináherslum varnarinnar í munnlegum málflutningi á morgun verði einmitt að sýna fram á að sú ákvörðun að ákæra að kæra aðeins níu af 30 standist ekki nánari skoðun.

Þá vakti mikla athygli þegar Össur Skarphéðinsson utanríkisráðherra og Einar K. Guðfinnsson þingmaður Sjálfstæðisflokksins báru vitni í dag. Þeir voru einnig vitni verjenda. Össur rifjaði upp þegar hann sjálfur braust á palla alþingis á sínum tíma og hélt ræðu.

Einar K. Guðfinnsson lýsti þeim tíma þegar mótmælendur brutu rúður á Alþingi og eldar voru kveiktir á Austurvelli. "Það var ekki þægilegt að vera þingmaður á þeim tíma," sagði Einar en tók fram að hann véfengdi ekki umboð skrifstofustjóra Alþingis að vísa máli níumenningana til rannsóknar.

"Þessir atburðir voru ógnvekjandi."

Fjöldi lögreglumanna bar einnig vitni í dag. Það sem var sameiginlegt í málflutningi þeirra var að enginn virtist vita hver stjórnaði aðgerðum þann 8. desember 2008 þegar þingverðir tilkynntu að Alþingishúsið lægi undir áras. Þá kom fram að í lögregluskýrslum yfir níumenningunum var meint brot skráð sem "húsbrot" en ekki sem árás á Alþingi.

Málflutningur hefst klukkan kortér yfir níu í fyrramálið og mun Lára V. Júlíusdóttir saksóknari hefja leik. Líkt og á fyrsta degi aðalmeðferðar hvert sæti í dómsal 101 setið og fjöldi myndatöku og fjölmiðlamanna sem fylgdust með réttarhöldunum.