Níumenningar: Össur ber vitni fyrir dómi

Össur Skarphéðinsson, utanríkisráðherra segist hafa heyrt meiri læti í dómsal en þegar níumenningarnir, ásamt um 30 öðrum, þustu inn í Alþingi þann 8. desember 2008. Össur bar vitni í dag ásamt Einari K. Guðfinnssyni.

Össur sagðist minnast þess að gert hafi verið hlé á þingfundi vegna atburðanna 8. desember en svo hafi umræðunni verið haldið áfram. Hann sagðist hafa heyrt mun meiri læti en þennan dag "til dæmis úr ræðustól Alþingis".

Össur greindi frá því að hann hefði sjálfur heimsótt þingpallana, eða galleríið eins og það er kallað, í gegnum tíðina. "Í þingsögunni er það vel þekkt að fyrsta ræðan mín var flutt úr galleríinu," sagði Össur og rifjaði upp að hann hefði nú ekki verið handtekinn fyrir vikið.

"Eftir að ræðunni sleppti var þingfundi slitið, það var mikil þröng í galleríinu. Allt fullt af stúdentum ásamt lögreglumönnum. Eftir ræðuna kom óeinkennisklæddur lögreglumaður og vildi færa mig til forseta þingsins."

Engar afleiðingar urðu þó af verknaðinn, vildi Össur meina, fyrir utan að faðir hans hafi skammað hann.

"Ég var ekki færður til skýrslutöku eða spurður út í þetta,"sagði Össur en hann var þá formaður stúdentaráðs Íslands sem kom að skipulagningu atburðarins. "Það var ekkert leyndarmál í háskólanum að við vorum að velta þessu fyrir okkur. Þetta var á margra vitorði, örugglega lögreglunnar líka."

Þá rifjaði Össur upp að eitt sinn hefðu menn með plastbyssur í hermannabúningum birst á þingpöllunum. Þá hefði honum frekar brugðið en yfir hinni meintu árás níumenningana á Alþingi.