Reykjanesbær vill undirbúa flutning Gæslunnar

Reykjanesbær er reiðubúinn til samstarfs við innanríkisráðuneytið um hagkvæmniathugun og undirbúning þess að flytja Landhelgisgæsluna til Suðurnesja í samræmi við yfirlýsingu ríkisstjórnar Íslands. Þetta kemur fram í bókun sem samþykkt var á bæjarstjórnarfundi í Reykjanesbæ í gær.

Það var á ríkisstjórnarfundi í Reykjanesbæ þann 9. nóvember síðastliðinn sem ríkisstjórnin lýsti yfir vilja til þess að flytja aðsetur Landhelgisgæslunnar til Reykjanesbæjar. Bæjarstjórnin segir að öll aðstaða fyrir Landhelgisgæslu Íslands sé fyrir hendi á Suðurnesjum. Þar sé húsnæði, flugbrautir, góð hafnaraðstaða og stoðkerfi sem fullnægi þörfum Landhelgisgæslunnar að öllu leyti.