Leita áfram að 15 ára gömlum pilti sem framdi vopnað rán á Selfossi

Leit stendur enn yfir af 15 ára gömlum pilti sem framdi vopnað rán í verslun Samkaupa á Selfossi klukkan hálf sex í dag. Verið er að leita á Selfossi sem og í nálægum bæjum, svo sem Eyrarbakka, Stokkseyri og Hveragerði. Pilturinn ógnaði afgreiðslustúlku með hníf.

Þegar tilkynning kom um að verið væri að fremja vopnað rán í versluninni fóru lögreglumenn á staðinn en þá var pilturinn á bak og burt. Hann ógnaði afgreiðslustúlku með hníf og bað um peninga. Stúlkan lét ekki undan og neitaði að gefa piltinum peninga. Þá greip pilturinn í vörur sem voru nálægt afgreiðslukassanum og hljóp út.

Eins og fyrr segir er pilturinn 15 ára gamall og hefur ekki áður komið við sögu lögreglu, samkvæmt upplýsingum frá varðstjóra hjá lögreglunni á Selfossi. Hann þekktist af myndbandsupptökum úr versluninni.