Reyndi að ræna Arion banka vopnaður grjóti

Maðurinn sem réðst inn í útibú Arion banka í Árbænum rétt rúmlega níu í morgun, var vopnaður grjóti samkvæmt upplýsingum frá lögreglunni á höfuðborgarsvæðinu. Hann krafðist fjármuna og braut í kjölfarið gler sem skilur að gjaldkera og viðskiptavini.

Maðurinn hafði ekkert upp úr krafsinu og flýði af vettvangi. Lögreglan leitar tveggja manna en aðeins annar þeirra fór inn í bankann. Samkvæmt upplýsingum frá lögreglunni var maðurinn með hulið andlit en lögreglan hefur greinargóða lýsingu á manninum auk þess sem hann náðist á eftirlitsmyndavélar.

Starfsmönnum bankans er brugðið eftir ránstilraunina. Upplýsingafulltrúi Arion Banka, Iða Brá Benediktsdóttir, segir starfsmennina fá áfallahjálp. Útibúið verður svo lokað fram eftir degi.