Bjarni Harðarson: Ég kann á Outlook

Bjarni Harðarson, upplýsingafulltrúi í landbúnaðar- og sjávarútvegsráðuneytinu, sendi póst á alla fjölmiðla í dag sem ætlaður var samstarfsmanni í ráðuneytinu. Efni póstsins var ábendingar vegna fréttatilkynningar sem til stóð að birta á vef ráðuneytisins. Þetta er í annað sinn sem Bjarni sendir póst á fjölmiðla óafvitandi. Í fyrra skiptið var um að ræða póst um Valgerði Sverrisdóttur sem átti að fara á aðstoðarmann hans og síðan úr óþekktu netfangi á fjölmiðla.

„Þetta er nú mjög orðum aukið. Þetta var ábending varðandi fréttatilkynningu og skipti engu máli hvort hún færi. Auðvitað geta menn velt vöngum yfir og birt fréttir af póstum frá mér," segir Bjarni um síðari póstinn. Hann segist þó fremur vilja að fjallað yrði um málið efnislega. Málið fjallar um tillögu sem stendur til að leggja fram um ný jarða- og ábúðarlög.

Aðspurður hvort Bjarni hafi hugsað sér að fara á námskeið til að læra á Outlook forritið er Bjarni fámáll. „Það er í raun ekki á mína ábyrgð að þetta fer útfyrir og ég kann á Outlook. En ég var nú reyndar ekki að vinna í því forriti," segir Bjarni. Hann vill ekki segja hvaða forriti hann var að vinna í.