Um 600 Íslendingar halda jólin í 26 stiga hita

Um 600 Íslendingar eru nú staddir á Kanaríeyjum þar sem jólin er haldin hátíðleg og að íslenskum sið. Þar er þó engin snjór heldur 26 stiga hiti og sól.

Íslendingarnir á eyjunum halda jólin að íslenskum sið þar sem hamborgarhryggur, hangikjöt og kalkúnn er borðaður. Þann 28. desember næstkomandi ætla Íslendingarnir á eyjunum að hittast og snæða saman af jólahlaðborði, þar sem íslenskur matur verður á boðstólunum.

Kristín Tryggvadóttir fararstjóri hefur eytt síðustu 15 árum á Kanaríeyjum og segir að flestir af þeim sem eyði jólunum á eyjunum komi einungis yfir hátíðarnar.

Stærsti hlutinn af þessu fólki er fólk sem kemur hingað yfir hátíðarnar, frá 20. desember og fram yfir áramót. Svo eru margir sem búa hérna lungan úr vetrinum, búa hérna kannski í 6 mánuði á ári," segir hún.

Íslenska jólahaldið á eyjunum hefur breyst mikið á síðustu árum, segir Kristín. „Það er náttúrlega fjölskyldufólk hérna, það hefur minnkað að það séu stórar fjölskyldur með mikið af börnum. Hérna áður fyrr voru fleiri farþegar og þá héldum við jólaball á jóladag eða annan í jólum. En núna er þetta svolítið breytt og þess vegna höfum við ákveðið að halda frekar jólahlaðborð," segir hún.

Í gærkvöldi fóru í kringum 200 Íslendingar á veitingastað þar sem haldið var í íslenskar hefðir þegar að jólamaturinn var borinn fram. Kristín segir að það hafi heppnast mjög vel. Og maturinn var ekki af verri endanum.

„Það var ýmislegt, boðið upp á forrétt graflax og þess háttar. Svo var boðið upp á svínahamborgarhrygg og kalkúnarbringur. Það er svolítið í anda okkar og jólanna á Íslandi. Þeir reyna að stíla inn á að hafa eitthvað sem okkur þykir gott," segir hún.

Þó að Íslendingarnir á Kanaríeyjum fá íslenskan jólamat og íslenska jólastemmingu, verður seint sagt að þeir hafi tekið íslenska veðrið með sér út.

„Í dag er 26 stiga hiti, sól og yndislegt," segir hún og tekur fram að það sé yndislegt að upplifa jólin í hitanum. „Þetta er samt svolítið öðruvísi en jólin eru alltaf í hjarta okkar," segir hún að lokum.