Mikilvægt að bæta aðgengi að hugrænni atferlismeðferð

Bæta þarf aðgengi almennings að hugrænni atferlismeðferð. Slíkt meðferðarform skilar í flestum tilfellum sambærilegum eða betri árangri en lyfjameðferð, en aðgengi er lakara, eftir því sem fram kemur í nýrri grein sem birtist í nýjasta hefti Læknablaðsins.

Í grein sálfræðinganna Magnúsar Blöndahls Sighvatssonar, Hafrúnar Kristjánsdóttur og Engilberts Sigurðssonar geðlæknis kemur fram að hugræn atferlismeðferð sé sálfræðimeðferð sem hafi náð mikilli útbreiðslu á tiltölulega skömmum tíma. Því sé mikilvægt fyrir lækna og annað heilbrigðisstarfsfólk að kynnast hugmyndafræði meðferðarinnar, þekkja hvernig hún fer fram og ekki síður hvar hún skilar mestum árangri og hver langtímaárangur sé í samanburði við lyfjameðferð og aðra sálfræðilega meðferð.

Höfundar greinarinnar benda á að meðferðin hafi þann kost umfram geðlyf að aukaverkanir séu nær aldrei vandamál og langtímaárangur að meðferð lokinni sé oft góður.