Atli hættir þingmennsku - jafnvel á þessu kjörtímabili

Atli Gíslason óháður þingmaður ætlar að hætta þingmennsku, jafnvel á þessu kjörtímabili. Varamaður Atla er í þingflokki Vinstri grænna sem þýðir að brotthvarf hans myndi styrkja stjórnarmeirihlutann. Atli segist hafa verið afvegaleiddur.

Atli var gestur í þættinum Í bítið á Bylgjunni í morgun þar sem hann fór meðal annars yfir aðdraganda þess að hann gekk í Vinstri græna árið 2003.

Það hafi fyrst og fremst verið vegna hugsjóna og nefndi hann þar kvennfrelsismál, umhverfismál og andstöðuna við ESB. Fyrir kosningarnar 2009 hafi hann barist hart gegn ESB og talað sig ráman gegn Icesave, þar sem Steingrímur J. Sigfússon hafi verið fremstur í flokki með hnefann á lofti.

Ríkisstjórnin hafi síðan verið stofnuð eftir kosningar árið 2009 og skömmu síðar hafi forysta VG skipt um skoðun í veigamiklum málum á borð við Icesave og inngönguna í ESB. Atli gekk síðan úr þingflokki Vinstri grænna, og endanlega úr flokknum á flokksþingi nú fyrir skömmu. Undir lok viðtalsins var hann spurður hvort hann ætlaði að halda áfram á þingi og sagðist hann ekki eiga von á því. Hann segir einu sinni ekki víst hvort hann klári þetta þing sem nú situr. „Ég er svona að hugleiða það.“

Varamaður Atla er Soffía Arndís Sigurðardóttir en hún er í þingflokki Vinstri grænna. Það er því ljóst að brotthvarf Atla myndi styrkja stjórnarmeirihlutann á Alþingi.