Áhættumat vegna hryðjuverka: Vatnsból skotmörk

Vatnsból höfuðborgarbúa eru talin geta verið skotmörk hryðjuverkamanna þar sem hægt er að menga þau. Þetta kemur fram í nýju áhættumati sem gert var fyrir svæðið.

Unnið hefur verið að sérstöku áhættumati fyrir höfuðborgarsvæðið síðustu tvö árin. Þar er farið yfir þær hættur sem geta steðjað að íbúum á svæðinu.

Í matinu er sérstök grein um hættuna sem stafar af óeirðum og hryðjuverkum. Þar er fjallað um það að þó ekki séu heimildir um hryðjuverk á Íslandi þá sé ljóst, ef litið er til nágrannaríkja okkar, að óvæntir atburðir geti átt sér stað eins og skotárásir í skólum, íþróttasvæðum og í verslunum. Einnig er tekið fram að huga þurfi að því að hægt sé að menga vatnsból alls höfðborgarsvæðisins.

„Það svæði er afgirt eins og það er í dag. En ég held að við þurfum að umgangast þessi vatnsverndarsvæði eins og okkar helstu lífæð. Þarna er í raun og veru okkar olía. Við þurfum að hugsa um hana og við þurfum í raun að gera allt sem hægt er að gera til að vernda hana fyrir komandi kynslóðir," segir Jón Viðar Matthíasson, slökkviliðsstjóri á höfuðborgarsvæðinu.

Hann telur svæðið þó ágætlega varið í dag.

Við getum sagt okkur það að ef einhver einstaklingur sé nógu einbeittur í að láta eitthvað slæmt af sér leiða þá yfirleitt ná þeir árangri. Ég held að enginn hér á landi né annars staðar sé með þær hugsanir," segir Jón Viðar.

Hættan á mengun vatnsbólsins er þó ekki í hæsta áhættuflokki í matinu en þangað rötuðu nokkur atriði. Til að mynda eldri byggingar þar sem hætta þótti á eldsvoða en Jón Viðar segir að þegar sé búið að gera viðeigandi ráðstafnir þar. Þá var talið að íbúum í Norðlingaholti stafaði hætta af sprengiefnageymslum á Hólmsheiði þar sem leyfi var til að geyma 50 tonn af sprengiefni.

Þá var gripið til þess að leyfa þeim að geyma minna magn í geymslunum þannig að nú er Norðlingaholtið fyrir utan áhrifasvæðið.