Niðurstaða Hæstaréttar kom ekki á óvart

Niðurstaða Hæstaréttar á föstudaginn kemur ekki á óvart, að mati Guðlaugs Þórs Þórðarsonar, þingmanns Sjálfstæðisflokksins. Hæstiréttur staðfesti á föstudaginn þá niðurstöðu Héraðsdóms Reykjavikur að neyðarlögin frá 6. október 2008 stæðust stjórnarskrá. Innlán í gamla Landsbankanum og Glitni skyldu teljast forgangskröfur umfram kröfur lánadrottna og hluthafa í bankanum.

„Þetta er staðfesting á því að það er hægt að beita neyðarrétti,“ sagði Guðlaugur Þór Þórðarson í þættinum Sprengisandi á Bylgjunni í morgun. Hann minnti á að íslenska ríkisstjórnin og allir flokkar á Alþingi, nema VG, hefðu samþykkt að fara þá leið að láta hluthafa bankanna og lánadrottna mæta afgangi.

Guðlaugur Þór sagði að langstærstur hluti innistæðna í bönkunum væru lágar upphæðir. Þetta ætti sérstaklega við um innistæður í bönkunum hér á landi.