Neyðarvistunin var yfirfull þegar unglingarnir voru handteknir

Neyðarvistunin á Stuðlum var yfirfull í gærkvöld þegar þrír unglingar voru handteknir og gistu fangageymslur lögreglunnar. Ástæðan er sú að taka þurfti á móti einum af þeim einstaklingum sem hafði strokið af meðferðarheimilinu í Háholti. Unglingarnir komust yfir lykla eins starfsmannsins í gær og þegar þeir áttu að fara í ró ákváðu þeir að ráðast til atlögu. Starfsmenn reyndu að stöðva þá en þegar það gerðist tóku unglingarnir í sundur sófa sem er á Stuðlum og bjuggu sér til vopn úr honum. Þegar starfsmennirnir sáu að þeir réðu ekki við aðstæður ákváðu þeir að kalla til lögreglu.

Mikið álag er jafnan á Stuðlum og Barnaverndastofa hefur kallað eftir því að opnað verði nýtt heimili fyrir unglinga sem svara illa meðferð. Bragi Guðbrandsson forstjóri Barnaverndastofu segir að þær aðstæður sem sköpuðust í gær sýni enn fremur fram á þessa þörf. Hann þakkar þrautþjálfuðu starfsfólki Stuðla fyrir að ekki fór verr.

Bragi segir að þessar aðstæður sem komu upp séu fátíðar. Það gerist að jafnaði einu sinni til tvisvar á ári að starfsmenn Stuðla þurfi að kalla eftir aðstoð lögreglunnar.

Unglingarnir eru enn í haldi lögreglunnar en þeir fara aftur á Stuðla í dag og þá verður fjölgað á vaktinni.