Innlent

Róbert á Carter segist saklaus af færslu á bland.is

Róbert Magnússon, hárgreiðslumeistari og eigandi hárgreiðslustofunnar Carter, vill koma því á framfæri að hann er ekki höfundur bréfs sem birtist á vefnum bland.is í gær. Málið hefur vakið mikla athygli en það kom upp þegar Hanna Dóra Stefánsdóttir þroskaþjálfi greindi frá því að fatlaðri konu sem þarf að fara allra sinna ferða í hjólastól var synjað um afgreiðslu á stofu Róberts.

Umræður spunnust um málið á netinu og á þræði á Bland.is skrifar einhver í nafni Róberts og lýsir sinni hlið í málinu. Í bréfinu, sem segir að stofan hans afgreiði ekki fatlað fólk út af auknum kostnaði. „Það kostar meira vesen, tíma og peninga að afgreiða fatlað fólk. Vesen, tíma og peninga sem við hreinlega höfum ekki sem lítil hársnyrtistofa," segir í bréfinu.

Róbert segir af og frá að þetta sé frá honum komið. Þá sé fjöldi fastra viðskiptavina stofunnar fatlaðir einstaklingar í hjólastól. Umrædd kona hafi hins vegar verið í sérlega stórum hjólastól og starfsfólk því átt erfitt um vik með að klippa hana.

Verslunarmiðstöðin Fjörður hefur nú einnig blandað sér í málið en Carter er þar til húsa. Framkvæmdastjóri Fjarðar vandar Hönnu Dóru ekki kveðjurnar þar. „Verslunarmiðstöðin Fjörður hefur verið stolt af því hve aðgengi fyrir fatlaða er hér til fyrirmyndar. Fjörður hefur vegna þessa tvisvar fengið viðurkenningu frá Sjálfsbjörgu, landssambandi fatlaðra." segir meðal annars. „Atvik það sem nú fer um netheima er til komið vegna ónógra samskipta tveggja aðila sem leysa hefði mátt með einu upplýsandi símtali. Í staðinn er búið að koma óorði á prýðis hársnyrtistofu og jafnvel heila verslunarmiðstöð."

Framkvæmdastjórinn, Albert Már Steingrímsson heldur áfram: „Starfsfólk sem vinnur á sambýlum og öðrum sambærilegum stofnunum verður að halda ró sinni, en ekki láta skapið hlaupa með sig í gönur. Það er ekki neinum til gagns að hrópa á torgum. Slíkt er ekki við hæfi og eitthvað sem þjóðfélagið þarf síst á að halda í núverandi ástandi."

Nánar verður fjallað um þetta mál í kvöldfréttum Stöðvar 2 í kvöld.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.