Tvær íslenskar konur létust í bílslysi

Tvær íslenskar konur létust í umferðarslysi í Alicante á Spáni í dag. Slysið varð þegar bíll sem þær voru í rakst saman við skólabíl sem var að keyra háskólanema heim eftir kennslustund. Utanríkisráðuneytinu á Íslandi hefur verið tilkynnt um atvikið og aðstoðar ráðuneytið nú ættingja kvennanna vegna málsins. Um er að ræða eldri konur, en Vísir hefur ekki nánari upplýsingar um þær.

Slysið varð á N-388 veginum nærri El Altet flugvellinum seinnipartinn í dag, eftir því sem fram kemur á vefnum Typically Spanish. Vefurinn segir að konurnar hafi látist samstundis og 19 af 43 farþegum hafi slasast. Þar af voru fimm sem slösuðust alvarlega. Sumir farþeganna festust í rútunni.

Konurnar sem létust hafa ekki verið nafngreindar.