Landsfundur Samfylkingarinnar settur í dag

Jóhanna Sigurðardóttir formaður Samfylkingarinnar setur 6. landsfund Samfylkingarinnar í íþróttamiðstöð Vals að Hlíðarenda í dag kl. 16.30.

Hefðbundin landsfundarstörf hefjast að setningarathöfninni lokinni.

Landsfundinum verður framhaldið á laugardaginn með nefndarstörfum og kosningum formanns, varaformanns og ritara. Dagskráin verður brotin upp með málstofum um baráttuna gegn hatri og fordómum, stefnumótun í málefnum eldri borgara, atvinnumál kvenna og tillögur stjórnlagaráðs að því er greinir frá í tilkynningu frá flokknum.

Þá flytur prófessorinn Richard Wilkinson erindi þar sem hann sýnir fram á orsakasamband jöfnuðar og velferðar.

Evrópuvakt Samfylkingarinnar bindur endahnút á dagskrá laugardagsins með umræðu og umfjöllun um Evrópumál og stöðu aðildarviðræðnanna þar sem Össur Skarphéðinsson utanríkisráðherra er meðal frummælenda. 

Á sunnudeginum verður stjórnmálaályktun landsfundar og tillögur afgreiddar, kosinn gjaldkeri, formaður framkvæmdastjórnar og kosið í framkvæmdastjórn, verkalýðsmálaráð og flokksstjórn. Stefnt er að slíta landsfundinum kl. 15.00 á sunnudaginn að lokinni stefnuræðu formanns.

Landsfundurinn er opinn félögum í Samfylkingunni. Nefndastarf er opið skráðum landsfundarfulltrúum.