Segir Þorstein hafa fylgst með sér og birst fyrir tilviljun

Siv Friðleifsdóttir alþingismaður sagði fyrir dómara í dag að Þorsteinn Húnbogason, fyrrum sambýlismaður sinn, hefði fylgst með sér og hefði oft birst fyrir tilviljun á ýmsum stöðum sem hún var á.

Hún sagðist hafa orðið vör við það að Þorsteinn virtist vita mikið um það hvar hún væri stödd. „Fyrst hélt ég að þetta væri tilviljun," sagði hún og tók fram að hún hafi haldið að Þorsteinn væri með manneskju sem væri að elta sig. Hún sagði að í eitt skiptið hafi hann birst í eigin persónu og hún hafi þá farið átta sig á því það geti ekki verið tilviljun.

Hún segist hafa fundið miða á heimili Þorsteins, sem hann skrifaði, en á honum stóð hvar Siv hafði verið frá mínútu til mínútu í heilan dag. „Þá áttaði ég mig á því að það væri eitthvað meiriháttar í gangi," sagði Siv.

Hún segir að hann hafi hringt í fyrrum tengdafólk sitt og spurt hvort að hún væri þar. Siv sagði einnig að Þorsteinn hafi vitað að hún hafi verið að hitta konu í Garðabænum. „Ég fór þá að gera mér grein fyrir því að hann hlyti að vera með tækjabúnað til að fylgjast með mér. Ég slökkti á bluetooth," sagði hún en hún grunaði að það væri eitthvað tengt farsíma hennar.

Hún hafi svo farið með bílinn í fyrirtæki og látið leita í bílnum. Stuttu síðar hafi henni verið tjáð að það væri staðsetningarbúnaður í bílnum. „Og mér brá mjög mikið og var eiginlega allri lokið við það. Ég bað um að þessi búnaður yfir staðfestur með skýrslu um að hann hefði fundist í bílnum."

Komið hefur fram í framburði tveggja manna sem vinna hjá fyrirtækjum sem setja svona búnað í bíla að alltaf þegar búnaðinum er komið fyrir er settur miði, sem er með grænum kassa í kringum, í hliðarrúðuna bílstjóramegin.

Í bílnum hennar Sivjar var enginn miði í hliðarrúðunni heldur var miði, sem var hætt að nota fyrir fimm árum síðan, í afturrúðu bílsins. Siv sagði að miðinn hefði ekki verið áður í bifreiðinni og hún telji að Þorsteinn hafi sett hann í bílinn þegar hún var erlendis.

Þorsteinn sagði hinsvegar að þegar hann hafi fært staðsetningarbúnaðinn úr einum bíl í þennan sem Siv og sonur hennar virðast hafa notað, hafi hann fengið tvo miða hjá fyrirtækinu. Tveir menn sem vinni þar á lager hafi afhent honum þá miða.

Um atvikið í Öskjuhlíðinni sem Þorsteinn minntist á í framburði sínum, um að Siv hafi verið þar með manni sem sé ástmaður hennar í dag og háttsettur innan lögreglunnar, segir Siv að hún hafi farið í Perluna á fund við mann.

Hún segir að Þorsteinn hafi þá skyndilega birst með öðrum manni og þeir hafi sest fjórum borðum frá þeim. Þegar hún svo stendur upp og fer, þá stari Þorsteinn á hana niður frá Perlunni. Siv sagði að á þessum tíma hafi staðsetningartækið verið í bílnum.

Hún segist svo hafa farið í fordrykk daginn eftir í húsnæði Veðurstofu Íslands og skilið bílinn eftir þar. Daginn eftir það hafi hún fengið þrjú „ógeðsleg" SMS frá Þorsteini. Hún segir að hann hafi sent þau því hann hafi því ekki séð hvar hún væri því ökuritin gæfi til kynna að bíllinn væri hjá Veðurstofunni. Þá hafi hann einnig með einhverju móti komist yfir ársyfirlit farsíma hennar.

„Það má ekki elta manneskju án þess að hún viti það, ég var ekki látin vita," sagði hún.

Hún lýsti einnig öðru atviki þar sem Þorsteinn hafi skyndilega birst. Hann hafi stoppað hjá bíóinu hjá Njálsgötu og hann hafi keyrt framhjá í átt að Snorrabraut og tekið þar U-beygju. Þar hafi hann „glápt" á hana og brosað. „Það er sjálfsagt skemmtilegt að geta fylgst með manni svona auðveldlega," sagið hún.

Þá hafi annað atvik komið upp þegar hún var búin að fjarlægja búnaðinn úr bílnum og leggja fram kæru, þá hafi Þorsteinn verið mættur fyrir framan Alþingi. „Ég tel að hann hafi verið mjög órólegur þá vegna þess að það var slökkt á búnaðinum. "