Fyrst til Alþingis og svo til þjóðar

Alþingi hefur þegar ákveðið að tillögur stjórnlagaráðs fari ekki til þjóðaratkvæðagreiðslu áður en umfjöllun þingsins um tillögurnar hefst, sagði Ásta Ragnheiður Jóhannesdóttir, forseti Alþingis á þingfundi í dag.

Ásta benti á að þetta hafi verið ákveðið þegar ályktun um skipan stjórnlagaráðs hafi verið samþykkt í mars síðastliðnum. Hún segir að það muni  einkum koma í hlut stjórnskipunar- og eftirlitsnefndar Alþingis að vinna tillögur um það hvernig fara á með tillögur stjórnlagaráðs um nýja stjórnarskrá.

Ásta Ragnheiður segir þó að ýmsar leiðir séu færar til að tryggja aðkomu almennings að gerð stjórnarskrárinnar. Hún vill til dæmis að stjórnskipunar- og eftirlitsnefndin leiti til almennings með auglýsingu um umsagnir líkt og gert var við breytingar á stjórnarskrá á þinginu 1994-1195 þegar mannréttindakafli stjórnarskrárinnar var endurskoðaður í heild sinni.