Hafa þungar áhyggjur af kjaradeilu háseta hjá Hafró

Stjórn Starfsmannafélags Hafrannsóknastofnunarinnar lýsir yfir þungum áhyggjum af stöðu mála í kjaradeilu háseta rannsóknaskipa stofnunarinnar við ríkisvaldið.

Í ályktun stjórnarinnar er bent á að nú þegar hafi stofnmæling að haustlagi, svokallað haustrall, raskast og ef deilur leysast ekki sem allra fyrst er mikil hætta á að sú mæling verði fyrir bý.

Þá segir að stofnmælingin gegni sífellt veigameira hlutverki við stofnmat okkar helstu nytjastofna og hefur undanfarin 2 ár haft sama vægi og stofnmælingin í mars í stofnmati þorsks og ýsu.

„Samfara haustralli fer fram loðnuleit og mæling. Sú mæling hefur verið nýtt til að meta magn ungloðnu og var grundvöllur byrjunarkvóta fyrir núverandi vertíð. Skorað er á deiluaðila að ganga til samninga af fullum þunga og komast sem allra fyrst að samkomulagi.“