Hagnaður bankanna á að fara til fólksins í landinu

„Ríkisstjórnin telur að bankarnir þurfi að leggja meira til fólksins í landinu,“ sagði Jóhanna Sigurðardóttir, forsætisráðherra, í stefnuræðu sinni í kvöld.

Hún sagðist skilja reiðina sem beinist að bönkunum. Það væri samfélagslegskylda þeirra að skila þeim mikla hagnaði sem þeir hafa skilað undanfarið aftur til samfélagsins með einhverjum hætti. Það myndi segja sig sjálft að hagnaðurinn yrði ekki nýttur til að greiða hluthöfum eða æðstu stjórnendum, eins og var gert fyrir hrun.

Hún sagði í upphafi ræðu sinnar að það myndi blasa við, samkvæmt skoðanakönnunum, að traust til Alþingis og stjórnarliða og stjórnarandstæðinga hafi aldrei verið minna. Hún sagði að endurnýjunin á Alþingi hefði aldrei verið meiri en á undanförnum árum. „Þrjátíu af sextíu þingmönnum eru hér í fyrsta skiptið,“ sagði hún.

Þá sagði hún að samstarfið við Alþjóðagjaldeyrissjóðinn væri nú lokið og markmiðunum væri náð. „Það eru mikil tímamót.“ Hér væri hagvöxtur væri farinn að sjást á nýjan leik og atvinnuleysi væri minnkandi.

„Endurreisnarstarfið hefur ekki verið sársaukalaust,“ sagði hún en tók þó fram að það hafi borið árangur. Margar ákvarðanir sem væru óvinsælar í dag væru teknar með langtímamarkmiði þjóðarinnar að leiðarljósi.

„Við þurfum að líta til þess hvernig Ísland muni reiða af í framtíðinni, við eigum að horfa til þess hvernig ungir Íslendingar muni standa að vígi í því alþjóða umhverfi sem við lifum í,“ sagði hún og lagði áherslu á að menntun væri þjóðinni mikilvægust. Til að mynda hefðu nemendum í Háskóla Íslands fjölgað um 19 prósent.

Þá nefndi hún einnig að ESB-samningurinn ætti að leggja í dóm þjóðarinnar  „Það gerum við með því að móta faglega og sterka kröfugerð.“

Hægt er að horfa á umræður um stefnuræðuna með því að smella á link á forsíðu Vísis.