Fíklar réðust á aldraðar konur

Lögreglan á höfuðborgarsvæðinu segir að í tvígang í gær hafi verið ráðist á fullorðnar konur þar sem þær voru einar á gangi. Um er að ræða konu á níræðisaldri í Þingholtunum og hinsvegar konu á áttræðisaldri skammt frá Smáralind.

Ráðist var að konunum og töskurnar rifnar af þeim svo þær skullu í jörðina. Þær urðu mjög skelfdar og hlutu einhverja áverka, segir lögreglan.

Gerendur í málinu fundust nokkrum klukkutímum síðar og voru handteknis. Í tilkynningu frá lögreglu segir að um hafi verið að ræða þrítugan karlmann og 18 ára stúlku en bæði voru í leit að skjótfengnum gróða til að fjármagna fíkniefnaneyslu sína.