Vill taka upp evru til þess að losna við verðtryggingu

Formaður efnahags- og skattanefndar vill taka upp evru til að losna við verðtrygginguna. Hagfræðingur hjá Seðlabankanum telur að afnám verðtryggingarinnar nú myndi fela í sér hærri raunvexti til lántaka en nú er.

Helgi Hjörvar, formaður efnahags- og skattanefndar Alþingis og Ásgeir Daníelsson, forstöðumaður rannsóknar- og spádeildar Seðlabankans, ræddu á opnum fundi Íslandsbanka í gær hvort raunhæft væri að afnema verðtrygginguna á Íslandi.

Ásgeir segir að það sé hægt, og framvegis yrðu verðtryggð lán í formi nafnvaxtalána, en hægt væri að koma í veg fyrir rýrnun þeirra með breytilegum vöxtum sem eru endurskoðaðir oft. Hann segir hins vegar að í slíku kerfi séu bæði hagfræðileg rök og reynslurök fyrir því að raunvextir verði hærri en nú er.

Helgi Hjörvar segir bestu leiðina að afnámi verðtryggingarinnar að taka upp annan gjaldmiðil.