Setti bílrúðuvökva í drykk starfsmanns

Starfsmaður á meðferðarheimilinu Geldingalæk þurfti að leita sér aðhlynningar á spítala eftir að unglingur á heimilinu laumaði eitruðum vökva í glas hjá honum.

Að Geldingarlæk, sem er nærri Hellu,er rekið meðferðarheimli á vegum Barnaverndarstofu fyrir börn á aldrinum 14 til 18 ára. Samkvæmt upplýsingum fréttastofu gerðist það svo í síðustu viku að einn unglingurinn laumaði Rain-X, sem er vökvi sem er notaður til þess að þrífa bílrúður, út í mjólkur- eða safaglas, eins starfsmannsins. Starfsmaðurinn leitaði á bráðamóttöku og fékk aðhlynningu en málið hefur verið kært til lögreglu.

Samkvæmt heimildum fréttastofu er ekkert sem bendir til þess að unglingnum hafi verið uppsigað við viðkomandi starfsmann. Hann hafi talið að efnið hefði laxerandi áhrif og hefði ætlað að beita starfsmanninn saklausum hrekki.

Rekstraraðili meðferðarheimilisins vildi ekki veita fréttastofu viðtal en staðfesti að atvikið hefði átt sér stað.