Össur: Forsetinn gekk of langt

Össur Skarphéðinsson, utanríkisráðherra, telur að forseti Íslands hafi gengið of langt þegar hann gagnrýndi ríkisstjórnina í erlendum fjölmiðlum vegna Icesave málsins. Ekki sé hægt að líta ummæli forseta öðruvísi en sem beina árás á stjórnvöld.

Ólafur Ragnar Grímsson, forseti Íslands, hefur viðtölum við innlenda og erlenda fjölmiðla að undanförnu gagnrýnt íslensk stjórnvöld sem og Evrópuríki harðlega vegna Icesave málsins.

Össur Skarphéðinssson, utanríkisráðherra, segir það óviðeigandi hjá forseta að gagnrýna evrópþjóðir með þeim hætti sem hann gerir. Össur bendir á að Norðurlöndin, Færeyjar og Pólland hafi sýnt Íslendingum mikinn stuðning í hruninu.

„Forsetinn verður að ráða því hvað hann segir. En það er ekki hægt að líta á þetta með öðrum hætti en svo að það hafi verið reynt að ráðast gegn ríkisstjórninni í þessu tiltekna máli og ekki síst fjármálráðherra. Það er mín skoðun," segir Össur.

Forseti hafi hins vegar rétt á því að opinbera sínar skoðanir.

„Hann hefur ekki farið út fyrir nein lagaleg mörk. Ég er hins vegar þeirrar skoðunar að forseti á ekki að tala svona gagnvart ríkisstjórninni."

Bjarni Benediktsson, formaður sálfstæðisflokks, tók málið upp á alþingi í dag þegar hann kallaði eftir viðbrögðum frá Steingrími J. Sigfússyni fjármálaráðherra.

Steingrímur sagðist hins vegar ekki vilja munnhöggvast við forseta útaf icesavemálinu.

„Og um ummæli helgarinnar. Það er full snemmt að krýna sig sjálfskipaðan sigurvegara í máli sem er ekki til lykta leitt. Málinu er ekki lokið. Kannski er hyggilegast að komast til botns í því og klára það og við skulum vona að það verði okkur öllum sem útláta minnst að lokum."