Ellilífeyrisþegar gætu þurft að greiða fyrir þvott og mat

Heimilismenn á dvalarheimilum gætu þurft að greiða sérstaklega fyrir sjúkraþjálfun, þvott og mat ef niðurskurðartillögur stjórnvalda ná fram að ganga. Dvalarheimilið Hrafnista þarf að skera niður um allt að áttatíu milljónir ef af verður.

Samtök fyrirtækja í heilbrigðisþjónustu funduð í síðustu viku með fulltrúum velferðaráðuneytisins þar sem þeim var sagt að til stæði að skera niður framlög ríkisins til þeirra um tvö prósent á næsta ári. Niðurskurðurinn hefur áhrif víða en samtökunum tilheyra þrjátíu og þrjú öldrunar- og hjúkrunarheimili svo og meðferðaheimili.

Á meðal þeirra sem sjá fram á að þurfa að skera niður eru Hrafnistuheimilin en þar þarf að skera niður um sjötíu til áttatíu milljónir á næsta ári ef af verður. Pétur Magnússon, forstjóri Hrafnistuheimilanna, segir að verulega hafi verið hagrætt á síðustu þremur árum og að ekki verði farið í frekari niðurskurð án þess að skerða þjónustu við þá sem dvelja á heimilunum. „Allir landsmenn þekkja þær kostnaðarhækkanir sem hafa verið að undanförnu og eru áfram eins og á matvöru og launahækkanir. Laun eru orðin að verða 80% af okkar rekstrarkostnaði. Það eru launahækkanir á þessu ári sem verða áfram á næsta ári. Við bara sjáum ekki fram úr hvernig við leysum frekari hagræðingu."

Pétur segir engar ákvarðanir enn liggja fyrir um hvernig niðurskurðinum verði mætt. „Við náttúrulega verðum að borga reikningana okkar eins og aðrir og eiga fyrir launum starfsfólks. Það er þá í raun bara tvennt að gera. Það er að hætta einhverri lögbundinni þjónustu, hvað sem það verður, eða þá taka upp einhverskonar gjaldtöku meðal heimilismanna eða eitthvað þess háttar."

Gjaldtakan geti verið á nokkrum sviðum. „Það væri þá að taka kannski upp einhver inntökugjöld. Eða þá fólk færi að taka þátt í greiðslu sjúkraþjálfunar, iðjuþjálfunar, þvottakostnaði eða jafnvel mat."

Pétur segir að nóg sé komið af niðurskurði í velferðakerfinu. Hann óttast mjög áhrifin ef að áformunum verður haldið til streitu en bindur vonir við að svo verði ekki. „Ég trúi því nú varla að þingmenn landsins fari að samþykkja þetta og koma svona illa fram við aldraða íslenska borgara. Ég trúi því ekki fyrr en ég sé það gerast," segir Pétur að lokum.