Vill að borgin veiti umsögn um kvótafrumvarpið

Borgarfulltrúar Sjálfstæðisflokksins vilja að gerð verði úttekt á áhrifum breytinga á fiskveiðistjórnunarkerfinu á atvinnulíf í Reykjavík. Einnig að farið verði fram á það að Reykjavíkurborg veiti Alþingi umsögn sína um málið með hliðsjón af hagsmunum Reykjavíkur. Tillaga þessa efnis var lög fram á borgarstjórnarfundi í dag.

Hanna Birna Kristjánsdóttir, oddviti Sjálfstæðisflokksins, sagði á borgarstjórnarfundi í dag að tillaga um þessa úttekt hafi verið flutt í borgarráði í lok júní, en hafi ekki enn verið afgreidd enn.  Hagsmunaaðilar og mörg sveitarfélög hafi aftur á móti sent Alþingi umsagnir sínar, þar sem bent er á ýmsa vankanta frumvarpsins og áhrif þess á uppbyggingu í atvinnulífi og lífskjör í landinu, þar með talið Reykjavík. 

Hanna Birna sagði að þetta aðgerðar- og afstöðuleysi meirihlutans bæri vott um „algjört áhugaleysi meirihlutans á brýnu atvinnumáli í Reykjavík“. Það vekti auk þess upp spurningar um hvort borgaryfirvöld væru uppteknari við að verja áherslur ríkisstjórnarinnar en hagsmuni borgarbúa.

Hanna Birna benti einnig á mikilvægi sjávarútvegs fyrir Reykjavík og sagði að 20 % aflaverðmætis kæmi til hafnar í Reykjavík.