Næstum 26.000 í alvarlegum vanskilum

Tæplega tuttugu og sexþúsund einstaklingar eru í alvarlegum vanskilum hér á landi en þeim hefur fjölgað um tæp tíu prósent frá áramótum. framkvæmdastjóri Creditinfo er svartsýnn á að ástandið lagist.

25.518 einstaklingar voru í alvarlegum vanskilum um síðustu mánaðarmót, en það merkir að kröfur hafa verið í vanskilum í 90 til 180 daga, og oft hafa málin farið fyrir dóm.

Einstaklingum í slíkum skuldavandræðum hefur fjölgað jafnt og þétt frá árinu 2008, eða um tíuþúsund. Hlutfall einstaklinga í alvarlegum vanskilum er hæst á Reykjanesi, tæplega 16%, en lægst mælist hlutfallið á Norðurlandi Vestra. Rúmlega fjórtán þúsund manns eru í þessum sporum á höfuðborgarsvæðinu eða 9,4%.

Fjölmargt ungt fólk er á meðal þeirra sem eru í alvarlegum vanskilum, 9% einstaklinga á aldrinum 18 til 29 ára og 15% einstaklinga á aldrinum þrjátíu til þrjátíu og níu ára. Hákon Stefánsson, framkvæmdastjóri hjá Creditinfo, er ekki bjartsýnn og telur ástandið eiga eftir að versna ef ekkert verður að gert.