Bjórinn mildaði þjóðhátíð

Bjórinn mildaði alla áferð þjóðhátíðarinnar í Vestmannaeyjum og áfengisneysla á hátíðinni varð minna vandamál eftir að bjórinn var leyfður, segir formaður þjóðhátíðarnefndar.

Páll Scheving Ingvarsson, formaður þjóðhátíðarnefndar, segir að mikil áfengisneysla sumra á þjóðhátíð í Eyjum hafi alltaf fylgt hátíðinni. Hann segir að það hafi sýnt sig að þeir gestir sem hafi haldið sig við mildari drykkina hafi verið meira til friðs en hinir.

„Ég held að það sé heppilegra að menn drekki veikari drykki og það hefur sýnt sig í framkvæmd .jóðhátíðar. Við höfum fundið það að bjórinn og lögleiðing hans mildaði alla áferð hátíðarinnar og framferði gesta var önnur,“ segir Páll og bætir við að ungt fólk í dag fara með áfengi en hans kynslóð sem ólst upp við sterkt vín.

Áfengisgjöld hækkuðu á síðasta ári og þar með hækkaði útsöluverð á áfengi umtalsvert. Þetta virðist skila sér í minnkandi eftirspurn, en sala á áfengi í vínbúðunum dróst saman um 15% í vikunni fyrir verslunarmannahelgi miðað við á sama tíma í fyrra.

Það virðist vera gósentíð hjá bruggurum en fjölmargar fréttir birtust síðasta vetur þar sem lögreglan gerði bruggtæki upptæk hjá landasölum. En er landadrykkja sérstakt vandamál á þjóðhátíð? „Nei, ég hef ekki tekið eftir því,“ segir Páll.