Farþegar Iceland Express enn fastir í Frakklandi

Flugvélin sem átti að fljúga með farþega Iceland Express frá Frakklandi er enn ekki farinn. Óli Þór Barðdal, einn farþeganna, gagnrýnir upplýsingaskort frá flugfélaginu til farþega.

Matthías Imsland, forstjóri Iceland Express, sagði við Vísi á fimmta tímanum í dag að finnsk vél myndi fljúga með farþegana til Íslands. Þeir væru í þann mund að fara í loftið.

Óli segir að upphaflega hafi þeim verið sagt að þau ættu að fara í loftið klukkan fimm í dag að íslenskum tíma. Það hafi brugðist. Þeim hafi þá verið tjáð að finnski flugmaðurinn væri veikur og það yrði ekki farið fyrr en seint í kvöld.

„Svo vorum við að fá þær fréttir frá öðrum að það er frönsk vél að koma frá suður Frakklandi. Við eigum að fara með henni klukkan níu,“ segir Óli Þór. Hann segist vera skilinn alveg eftir í lausu lofti. Engar upplýsingar hafi borist fyrir utan eitt SMS sem var sent í dag.