Sjómannadagurinn haldinn í skugga kvótafrumvarpa

Sjómannadagurinn er haldinn hátíðlegur um allt land og klukkan tvö hefjast hefðbundin ræðuhöld sem jafnan fylgja sjómannadeginum.

Dagurinn nú er haldinn í skugga mikilla deilna í iðngreininni því ríkisstjórnin hefur lagt fram tvö umdeild kvótafrumvörp.

Á Patreksfirði er forseti Íslands, Ólafur Ragnar Grímsson, aðalræðumaður. Hann ætlar í ræðu sinni að tala um  nauðsyn þess að sátt ríki um skipulag fiskveiða og fiskvinnslu og að stjórnskipulag þeirra mála efli hag sjávarbyggða og atvinnulíf á landsbyggðinni.

Einn aðalræðumaður hátíðarhaldanna í Reykjavík, Ragnar Árnason, prófessor í fiskihagfræði, segir sátt ekki í sjónmáli og að nýju frumvörpin, verði þau að lögum, muni hafa í för með sér tekjuskerðingu fyrir sjómenn og byggðalög.

Ragnar verður ekki eini ræðumaðurinn út á Granda í dag. Sjávarútvegsráðherrann sjálfur, Jón Bjarnason, flytur ræðu, sem og tónlistarmaðurinn og trillukarlinn Kristján Kristjánsson, eða KK eins og hann er oftast kallaður. Ræðuhöldin hefjast klukkan tvö.