Black Pistons hálfgildir meðlimir: Hamingjuóskir frá Evrópu

„Við höfum fengið fregnir af því að þeir hafi hlotið þessa stöðu,“ segir Friðrik Smári Björgvinsson, yfirlögregluþjónn hjá lögreglunni á höfuðborgarsvæðinu, um nýja stöðu vélhjólaklúbbsins Black Pistons, sem nú er orðinn Outlaw prospect.

Tilkynningu um þetta má finna á erlendri heimasíðu vélhjólaklúbbsins Outlaw. Þar er hinum nýju félögum óskað til hamingju á spjallsvæði vefsins. Þeir fá meðal annars hlýjar kveðjur frá Frakklandi og Svíþjóð.

Tveir meðlimir klúbbsins, þar á meðal forseti gengisins hér á landi, Ríkharð Júlíus Ríkharðsson, ásamt félaga sínum, Davíð Frey Rúnarssyni, voru handteknir fyrir skömmu eftir að þeir eiga að hafa beitt mann, sem þeir réðust á og héldu nauðugum, hrottalegum hótunum og ofbeldi.

Þeir eru sakaðir um að hafa barið hann klukkustundum saman í höfuðið og líkama með ýmsum áhöldum, hýtt hann með þykkri rafmagnssnúru og hótað honum að skornar yrðu í sundur sinar á fótleggjum og tennur dregnar úr honum. Þeir sögðu fórnarlambinu að það skuldaði þeim tíu milljónir króna.

Enn fremur hefur lögreglan fengið upplýsingar um að Davíð Freyr hafi svipt annan mann frelsi og haldið föngnum og misþyrmt í bifreið og í iðnaðarhúsnæði. Rannsókn þessa máls er á frumstigi, að því er fram kemur í gögnum frá lögreglustjóranum á höfuðborgarsvæðinu, sem send voru Hæstarétti.

Ríkharð hefur hafið afplánun á glæpi sem hann var dæmdur fyrir á síðasta ári. Þá kveikti hann í húsi ásamt félögum sínum á meðan íbúinn var enn inni. Hann komst út við illan leik og voru brennuvargarnir handteknir í kjölfarið.

Heimildarmaður sem Vísir ræddi við og er kunnugur heimi vélhjólagengja hér á landi, sagði mikinn mun á milli Outlaws gengisins og Hells Angels. Vélhjólagengin tvö eru svarnir óvinir erlendis en hér á landi hafa félagsmenn látið hvorn annan í friði. Ríkislögreglustjóri óttast þó átök.

Heimildarmaður Vísis segir það hafa komið sér á óvart hversu fljótt Black Pistons fór úr því að vera stuðningsklúbbur Outlaws yfir í að vera prospect, eins og það er kallað. Í tilviki Hells Angels þá var vélhjólaklúbburinn Fáfnir áhangandi í nokkur ár áður en klúbburinn varð Hells Angels prospect. Þeir urðu svo fullgildir meðlimir tæplega tveimur árum síðar, eftir að hafa reynt að komast í klúbbinn í um áratug.

„Það kæmi því ekki á óvart að Black Pistons væru orðnir fullgildir meðlimir Outlaws innan örfárra mánaða,“ sagði heimildarmaður Vísis um þróun klúbbsins sem virðist hraðari en hjá Hells Angels.

Samkvæmt upplýsingum frá lögreglunni þá fylgist greiningadeild lögreglunnar náið með vélhjólagengjum hér á landi.